புழுவாய்ப் பிறக்கினும்

புழுவாய்ப் பிறக்கினும் புண்ணியா வுன்னடி யென்மனத்தே

வழுவா திருக்க வரந்தர வேண்டுமிவ் வையகத்தே
தொழுவார்க் கிரங்கி யிருந்தருள் செய்பா திரிப்புலியூர்ச்
செழுநீர்ப்புனற்கங்கை செஞ்சடைமேல்வைத்த தீவண்ணனே.

_தேவாரம் -நான்காம் திருமுறை- திருநாவுக்கரசர்

தலம்: திருப்பாதிரிப்புலியூர் 

பண்: திருநேரிசை 

திருப்பாதிரிப்புலியூர் என்னும் இத்தலம் நடுநாட்டிலுள்ளது. இது கடலூரின் ஒரு பகுதி.

வேறு பெயர்: திருப்பாப்புலியூர்

சுவாமியின் பெயர்கள்:

தோன்றாத்துணை யீஸ்வரர், பாடலீஸ்வரர்

தேவியாரின் பெயர்கள்:

தோகையம்பிகையம்மை, பெரியநாயகி, அருந்தவநாயகி

பொழிப்புரை :

இவ்வுலகிலே அடியவர்களுக்கு இரக்கப்பட்டு அருள் செய்கின்ற, திருப்பாதிரிப் புலியூரில் உறையும், செழுமையான கங்கைநீரைச் செஞ்சடையில் தேக்கி வைத்திருக்கும் தீப்போன்ற செந்நிறத்துப் பெருமானே ! அடியேன் மறுபிறவியில் புழுவாகப் பிறந்தாலும் புண்ணியமே வடிவெடுத்த உன் திருவடிகள் அடியேன் மனத்தை விட்டு நீங்காதிருக்குமாறு அடியேனுக்கு அருள் செய்ய வேண்டும்.

திருச்சிற்றம்பலம்

குனித்த புருவமும்

கோயில் – திருவிருத்தம்

குனித்த புருவமும், கொவ்வைச் செவ்வாயில் குமிண் சிரிப்பும்,

பனித்த சடையும், பவளம் போல் மேனியில் பால் வெண் நீறும்,

இனித்தம் உடைய எடுத்த பொன்பாதமும் காணப் பெற்றால்

மனி(த்)தப் பிறவியும் வேண்டுவதே, இந்த மா நிலத்தே!

                                           --- திருநாவுக்கரசு சுவாமிகள் 

பொருள்:

 வளைந்த புருவங்களையும், கொவ்வைக்கனி போன்ற சிவந்த வாயிலே முகிழ்க்கும் புன்னகையையும், கங்கையால் ஈரமான சடைமுடியையும், பவளம் போன்ற சிவந்த திருமேனியில் அணிந்த பால் போன்று வெண்மையான வெண்ணீற்றுப் பூச்சினையும், பேரின்பம் நல்கும் தூக்கிய திருவடிகளையும் காணும் வாய்ப்பினைப் பெறுவதாம்பட்சத்தில் இவ்வுலகில் மனிதராய்ப் பிறப்பெடுத்தலும் விரும்பத்தக்க செயலாகும். 

திருச்சிற்றம்பலம்