தமிழகத்தின் எரிசக்தி புரட்சி: இயற்கை எரிவாயு உற்பத்தி மற்றும் விநியோகக் கட்டமைப்பு

எரிசக்தி என்பது ஒரு நாட்டின் பொருளாதார வளர்ச்சியின் முதுகெலும்பாகும். தமிழ்நாட்டில் காவிரி படுகை (Cauvery Basin) இயற்கை எரிவாயு உற்பத்தியில் மிக முக்கியப் பங்கு வகிக்கிறது. பூமிக்கு அடியில் இருந்து எடுக்கப்படும் இந்த வாயு, நவீனத் தொழில்நுட்பங்கள் மூலம் சுத்திகரிக்கப்பட்டு தொழிற்சாலைகளுக்கும், வீடுகளுக்கும் பாதுகாப்பான முறையில் கொண்டு செல்லப்படுகிறது.

உற்பத்தி மற்றும் சுத்திகரிப்பு முறை

பூமிக்கு அடியில் இருந்து எடுக்கப்படும் வாயுவை நேரடியாகப் பயன்படுத்த முடியாது. ஏனெனில் அதில் நீர், மணல் மற்றும் பிற வாயுக்கள் கலந்திருக்கும்.

• சேகரிப்பு: நிலத்தடியில் இருந்து எடுக்கப்படும் கச்சா எண்ணெய் மற்றும் வாயு கலவை Gas Gathering Station (GGS) எனப்படும் நிலையங்களுக்குக் கொண்டு வரப்படுகிறது.

• பிரித்தெடுத்தல்: அங்குள்ள பெரிய கலன்கள் மூலம் எண்ணெய், நீர் மற்றும் எரிவாயு ஆகியவை தனித்தனியாகப் பிரிக்கப்படுகின்றன.

• சுத்திகரிப்பு: வாயுவில் உள்ள ஈரப்பதம் (Dehydration) மற்றும் தேவையற்ற நச்சு வாயுக்கள் (CO2, H2S) நீக்கப்படுகின்றன.

• அழுத்தக் கட்டுப்பாடு: சுத்திகரிக்கப்பட்ட வாயுவை நீண்ட தூரத்திற்கு குழாய்கள் வழியாக அனுப்ப, அதன் அழுத்தம் (Compression) அதிகரிக்கப்படுகிறது.

விநியோகக் கட்டமைப்பு (Pipeline Network)

சுத்திகரிக்கப்பட்ட இயற்கை எரிவாயு (Natural Gas) இரண்டு முக்கிய வழிகளில் விநியோகிக்கப்படுகிறது:

1. தொழில்நுட்பப் பயன்பாடு: நாகப்பட்டினம், ராமநாதபுரம் போன்ற மாவட்டங்களில் உள்ள மின் உற்பத்தி நிலையங்கள் மற்றும் உரத் தொழிற்சாலைகளுக்கு நிலத்தடி குழாய்கள் மூலம் இது நேரடியாக வழங்கப்படுகிறது.

2. நகர எரிவாயு விநியோகம் (City Gas Distribution - CGD):

• CNG (Compressed Natural Gas): வாகனங்களுக்கு பெட்ரோல், டீசலுக்கு மாற்றாக வழங்கப்படுகிறது.

• PNG (Piped Natural Gas): வீடுகளுக்கு நேரடியாக சமையல் எரிவாயுவாகக் குழாய் மூலம் வழங்கப்படுகிறது.

தமிழகத்தில் மாவட்ட வாரியான விநியோக நிறுவனங்கள்

மத்திய அரசின் அனுமதியுடன் தமிழ்நாட்டின் பல்வேறு பகுதிகளில் வெவ்வேறு நிறுவனங்கள் எரிவாயு விநியோகப் பணிகளை மேற்கொண்டு வருகின்றன:

• சென்னை & புறநகர்: டோரண்ட் கேஸ் (Torrent Gas) மற்றும் AG&P பிரதம்.

• கோவை, மதுரை & சேலம்: இந்தியன் ஆயில் (IOCL).

• திருச்சி & தஞ்சாவூர்: மேகா கேஸ் (Megha Gas).

• மயிலாடுதுறை & கடலூர்: அதானி கேஸ் (Adani Gas).

LPG-க்கும் PNG-க்கும் உள்ள வேறுபாடு

LPG (சிலிண்டர்) என்பது புரோப்பேன் மற்றும் பியூட்டேன் கலவையாகும். இது காற்றை விட கனமானது. ஆனால், குழாய் மூலம் வரும் இயற்கை எரிவாயு (PNG) என்பது பெரும்பாலும் மீத்தேன் (CH4) ஆகும். இது காற்றை விட லேசானது என்பதால், கசிவு ஏற்பட்டால் உடனடியாக காற்றில் கலந்துவிடும். இதனால் தீ விபத்து அபாயம் மிகக் குறைவு.

சுற்றுச்சூழலுக்குப் பாதிப்பு ஏற்படுத்தாத, மலிவான மற்றும் பாதுகாப்பான எரிசக்தியை மக்களுக்கு வழங்குவதில் இயற்கை எரிவாயு முக்கிய இடத்தைப் பிடிக்கிறது. தமிழகத்தின் அனைத்து மாவட்டங்களுக்கும் இந்தக் குழாய் வழி எரிவாயுத் திட்டம் விரிவடையும் போது, அது மாநிலத்தின் தொழில் வளர்ச்சியிலும், மக்களின் வாழ்வாதாரத்திலும் மிகப்பெரிய மாற்றத்தை ஏற்படுத்தும்.

Gemini generated Image

சமையல் கேஸ் சிலிண்டரை சிக்கனமாகப் பயன்படுத்துவது எப்படி?

சமையல் எரிவாயுவை (LPG) சிக்கனமாகப் பயன்படுத்துவது குடும்ப பட்ஜெட்டிற்கு மட்டுமல்ல, சுற்றுச்சூழலுக்கும் நல்லது.

முக்கியமான சூத்திரம்:

முன்கூட்டியே திட்டமிட்டுத் தயார் செய்தல் + மூடி வைத்தல் + குறைந்த தீ = கேஸ் மிச்சம்!

சமையலைத் தொடங்கும் முன் தேவையான அனைத்துப் பொருட்களையும் (காய்கறிகள், மசாலா) நறுக்கித் தயார் நிலையில் வைக்கவும்.

சமைக்கும் பாத்திரத்தின் அடிப்பாகம் பர்னரை விடப் பெரியதாக இருக்க வேண்டும்.

பாத்திரத்தின் அடிப்பாகம் அகலமாகவும், தட்டையாகவும் இருந்தால் வெப்பம் சீராகப் பரவும்.

பாத்திரத்தின் வெளிப்புறம் ஈரமில்லாமல் துடைத்துவிட்டு அடுப்பில் வைக்கவும்.

எப்போதும் பாத்திரங்களை மூடி வைத்துச் சமைக்கவும் (இது 15-20% எரிபொருளை மிச்சப்படுத்தும்).

பிரஷர் குக்கரை அதிகமாகப் பயன்படுத்தவும்.

பாத்திரங்களில் படிந்துள்ள கறைகளை நீக்கிச் சுத்தமாக வைத்திருக்கவும் (கறை வெப்பத்தைக் கடத்தத் தாமதப்படுத்தும்).

மண் பாத்திரங்களை விட உலோகப் பாத்திரங்கள் (Stainless steel/Steel/Aluminium) விரைவாகச் சூடாகும்.

சிறிய பர்னருக்குச் சிறிய பாத்திரத்தையும், பெரிய பர்னருக்குப் பெரிய பாத்திரத்தையும் பயன்படுத்தவும்.

பருப்பு வகைகளைச் சமைப்பதற்கு முன் 1-2 மணி நேரம் ஊறவைக்கவும்.

அரிசியைச் சமைப்பதற்கு அரை மணி நேரம் முன் ஊறவைக்கவும்.

குளிர்சாதனப் பெட்டியிலிருந்து எடுத்த பொருட்களை (பால், காய்கறி) அறை வெப்பநிலைக்கு வந்த பிறகு சமைக்கவும்.

சிறிய துண்டு இஞ்சி, பூண்டு போன்றவற்றை நசுக்கிக் சேர்த்தால் சீக்கிரம் வேகும்.

காய்கறிகளைச் சிறிய துண்டுகளாக நறுக்கினால் விரைவில் வேகும்.

தேவையற்ற அதிகப்படியான தண்ணீரை ஊற்றிச் சமைப்பதைத் தவிர்க்கவும்.

சமைக்கும் போது பாத்திரத்தின் மூடியை அடிக்கடி திறந்து பார்க்க வேண்டாம்.

இண்டக்ஷன் அடுப்பு இருந்தால், சில உணவுகளை அதில் சமைத்து எரிவாயுவை மிச்சப்படுத்தலாம்.

'செபரேட்டர்' (Separator) உள்ள குக்கர்களைப் பயன்படுத்தினால் ஒரே நேரத்தில் 3 பொருட்களைச் சமைக்கலாம்.

காப்பர் பாட்டம் (Copper bottom) பாத்திரங்கள் வெப்பத்தை விரைவாகக் கடத்தும்.

பழைய, ஓட்டை விழுந்த அல்லது சரியாக மூடாத குக்கர்களை மாற்றவும்.

பர்னரில் உள்ள துளைகள் அடைப்பின்றி இருக்க அடிக்கடி ஊசியால் சுத்தம் செய்யவும்.

நீல நிறச் சுடர் (Blue flame) வருகிறதா என்று கவனிக்கவும். மஞ்சள் நிறச் சுடர் வந்தால் எரிபொருள் வீணாகிறது என்று அர்த்தம்.

கேஸ் கசிவு இருக்கிறதா என்பதை ரெகுலேட்டர் மற்றும் டியூப்பில் அடிக்கடி சரிபார்க்கவும்.

சமையல் முடிந்ததும் ரெகுலேட்டரை அணைக்கவும்.

பர்னரைச் சுத்தமாக வைக்காவிட்டால் வெப்பம் சீராகக் கிடைக்காது.

அடுப்பைச் சுற்றிக் காற்று பலமாக வீசாதபடி ஜன்னல்களைச் சிறிது சாத்தவும் (சுடர் அலைபாய்ந்தால் வெப்பம் வீணாகும்).

தரமான ISI முத்திரை பெற்ற அடுப்பு மற்றும் டியூப் பயன்படுத்தவும்.

டியூப் பழையதாகிவிட்டால் உடனடியாக மாற்றவும்.

அடுப்பை ஒரு தட்டையான மேடையில் வைக்கவும்.

பர்னரின் தட்டுகள் சரியாகப் பொருந்தியுள்ளதா என்று பார்க்கவும்.

சமைக்கப் பயன்படுத்தும் நீரை முடிந்தால் வெய்யிலில் முதலில் சூடுபடுத்திக்கொள்ளலாம்.

குறைந்த தீயில் (Simmer) வைத்துச் சமைப்பது எரிபொருளைச் சேமிக்கும்.

உணவைச் சூடுபடுத்தும் போது தேவையான அளவு மட்டும் எடுத்துச் சூடுபடுத்தவும்.

ஒருமுறை சமைத்த உணவை மீண்டும் மீண்டும் சூடுபடுத்துவதைத் தவிர்க்கவும். Hot pack பயன்படுத்தலாம்.

காய்கறிகளைப் பாதியளவு வேகவைத்துவிட்டு அடுப்பை அணைத்து மூடி வைத்தால், அந்த ஆவியிலேயே மீதி வெந்துவிடும்.

வறுப்பதை விட ஆவியில் வேகவைப்பது கேஸை மிச்சப்படுத்தும்.

அதிகப்படியான எண்ணெயைச் சூடுபடுத்தித் தீயவிட வேண்டாம்.

முடிந்தவரை ஒரே நேரத்தில் எல்லா உணவுகளையும் சமைத்து முடிக்கவும்.

அடிக்கடி டீ, காபி போடுவதைத் தவிர்த்து, பிளாஸ்க் பயன்படுத்தவும்.

சமையலில் திட்டமிடுதல் இருக்கட்டும்.

தேவையற்ற நேரங்களில் அடுப்பை எரிய விடாதீர்கள்.

தேவையான எண்ணிக்கையில் குக்கர் விசில் வந்தவுடன் அடுப்பை அணைக்கப் பழகுங்கள்.

சில உணவுகளைச் சமைக்க 'சோலார் குக்கர்' பயன்படுத்தலாம்.

குடும்ப உறுப்பினர்கள் அனைவரும் ஒரே நேரத்தில் சாப்பிட்டால் உணவை மீண்டும் சூடுபடுத்த வேண்டியிருக்காது.

கேஸ் சிலிண்டரின் எடையைச் சில சமயங்களில் சரிபார்க்கவும்.

தரமற்ற லைட்டர்களைப் பயன்படுத்த வேண்டாம்.

கேஸ் சேமிப்புப் பற்றி வீட்டில் உள்ள மற்றவர்களுக்கும் விழிப்புணர்வு ஏற்படுத்தவும்.

சமையலறை காற்றோட்டமாக இருக்கட்டும், ஆனால் அடுப்பு அருகே காற்று வீசக்கூடாது.

கேஸ் முடிந்துவிடும் நிலையில் இருந்தால் முன்கூட்டியே மாற்று சிலிண்டரைத் தயார் நிலையில் வைக்கவும். இது சமைத்துக் கொண்டிருக்கும் உணவின் வெப்ப இழப்பைக் குறைக்கும்.

Google Generated Image

நல்காத செல்வம்!

 

9. நல்காத செல்வம்!

செல்வம் சிலரிடம் தானாகவே சேருகின்றது. பலரிடம் முயற்சியின் அளவாலே தொழில் பெரிதானாலும்கூடச் செல்வம் மிகுதியாக வந்து சேர்வது இல்லை. செல்வத்தின் இத்தகைய நிலையினை நம் முன்னோர்கள் உணர்ந்தவர்கள்.

இதனால், செல்வம் சேர்வது பிறருக்குக் கொடுத்து அவரையும் நல்வாழ்வினராகச் செய்வதற்கே என்பதனை அவர்கள் வற்புறுத்தினர். கொடுக்கும் பண்பு சிறந்த மனிதப் பண்பாகவும் ஆயிற்று. கொடுப்பவரினும், மேம்பட்ட வள்ளல்களாகப் பலர் இருந்தனர்.

கொடையினால் நாட்டின்கண் பரவுகின்ற புகழையும் அதனால் தமக்கு உயர்கின்ற பேற்றையும் கருதி, கொடுக்கும் குணமற்ற சிலரும் கூடக் கொடுக்கும் வழக்கம் உடையவராக மாறினர்.

சோழன் கொடையின் மரபினை அறியாதவன் அல்லன். மரபினை அறிந்ததுடன் அதனைப் பேணி நிகழ்த்தியும் சிறப்புப் பெற்றிருந்தான். எனினும், ஒருநாள் அவனுக்கு ஓர் ஐயம் எழலாயிற்று. அருகிலிருந்த ஒளவையாரிடம் அதற்கு விளக்கமும் கேட்கலானான்.

"அம்மையே! வாழ்வில் இச்சை உடையவர்கள் மனிதர்கள். அவர்கட்குப் பொருளினால் பயன் உண்டாகும். அவர்கட்குப் பொருளை வழங்குவதும் தகுதியுடையதாகிறது. ஆனால், சிவனடியார்கள் சிலரும் வந்து பொருள் கேட்கின்றனரே? உலக இச்சையை ஒழித்து இறையின்பத்திலே திளைக்கும் அவர்கட்குப் பொருள் வழங்குவது முறையா? அந்தப் பொருள் அவர்களுடைய சிவ ஒழுக்கத்தையே மாற்றிவிடாதா?" என்றான்.

சோழனின் அறிவுநுட்பம் ஒளவையாரைச் சிந்திக்க வைத்தது. அவர் விளக்கம் கூறலானார்.

"மன்னவ! செல்வத்தைச் சிவனடியார்க்கு வழங்க வேண்டுமோ என்கிறாய்? அவர்கள் அதனைச் சிவகாரியங்களாகிற பொது நன்மைக்கு உதவுகிறவற்றிலே தான் செலவிடுவர். அதனால், அவருக்கு அளிக்கும் கொடை அளவற்ற பலருக்கும் அளித்த கொடையாகிப் பரந்த புகழினை நினக்குத் தருகிறது. இதனை எண்ணினால், அவருக்கு மனமுவந்து வாரி வழங்குதலே செய்ய வேண்டியதாகும் என்பேன் யான்.

அவருக்கு வழங்காத செல்வங்கள் வேறு என்ன வகைக்குப் பயனாகப் போகின்றன? பில்லி சூனியக்காரர்களுக்குப் பயன்படலாம். பேயூட்டுகளுக்குப் பயன்படுத்தப்படலாம். பரத்தையர்கட்கு வழங்கி அவரைக் கூடி இன்புற்றுக் கெடலாம். வீண் செலவுகள் செய்யலாம். கொள்ளைக்காரர்களுக்கு விருந்தாகலாம். மனத்தை மயக்கும் கள்ளுக்கு விலையாகத் தரலாம். அல்லது பகை அரசரால் எடுத்துக் கொள்ளப்பட்டும் போகலாம். கள்ளருக்குக் கவர்ந்து போவதற்கும், நெருப்பிற்கு உணவாவதற்கும் கிடைக்கலாம்.

இவற்றால் ஆகும் சிறப்பென்ன? அதனால், இவற்றிற் பாழாகிற பணத்தை தடுத்து நம்பன் அடியவர்க்கு நல்குவதே சிறப்புடைய செயலாகும்."

ஒளவையாரின் விளக்கம் மிகவும் தெளிவாக இருந்தது. சோழனும் மகிழ்ந்து அவரைப் போற்றினான்.


நம்பன் அடியவர்க்கு நல்காத் திரவியங்கள்
பம்புக்காம் பேய்க்காம் பரத்தையர்க்காம் - வம்புக்காம்
கொள்ளைக்காம் கள்ளுக்காம் கோவுக்காம் சாவுக்காம்
கள்ளர்க்காம் தீக்காகும் காண்.


"நம் பெருமானான சிவனின் அடியவர்களுக்கு மனமுவந்து வழங்காத செல்வங்கள், சூனிய வித்தைகட்கும், பேய் வழிபாடுகட்கும், பரத்தையர்களுக்குக் கொடுத்தற்கும், வீண் செயல்களுக்கும், கொள்ளை கொடுத்தற்கும், மதுவுக்கும், பகை அரசரால் பறிமுதல் செய்யப்படுவதற்கும், அவனுடைய சாவுச் செலவிற்கும், கள்வரால் கவர்ந்து கொள்ளப்படுவதற்கும், நெருப்பால் வெந்து அழிக்கப்படுவதற்குமே உரியவாகும்" என்பது பொருள்.

அடியார் உலக நலம் கருதுபவர். உலகம் உய்வதற்குப் பாடுபடும் உயர்ந்தோருக்கு உதவுவது மிக உயர்வுடையதாகும் என்பது கருத்து.

சிறந்த செயலைச் செய்பவர்க்கு உதவாதவர்களின் மனநிலை இழிந்ததாகவே இருக்கும். அதனால் தான் அவர்களின் செல்வம் பல வழிகளிலும் பாழாகும் என்கிறார்.

சிவ காரியங்களுக்குப் பயன்படுத்தாத செல்வம் அவகாரியங்களிலே வீணாகிக் கரையும் என்பதும் இது.

-    புலியூர்க் கேசிகனின் ஒளவையார் தனிப்பாடல்களில் இருந்து.



Gemini Generated Image

அழகு எது?

 

8. அழகு எது?

ஒரு சமயம், சோழன் ஒளவையாரிடம் உரையாடிக் கொண்டு இருந்தான். திடுமென அவனுக்கு ஓர் ஐயம் பிறந்தது. உலகில் அழகியவை எனக் கூறப்படுபவை யாவை? அதனை அறிந்து கொள்ள அவன் கருதினான். ஒளவையாரிடம் வினவ, அவர்
அழகின் உண்மையை விளக்குகின்றார்.

"ஓர் இளம்பெண் தன் நாயகனோடு கூடி வாழ்ந்து இன்புற்று மகிழ்கின்றாள். அவளுடைய கூட்டத்தினால் அவனும் நிறை வெய்துகின்றான். இறுதியில், அவள் களைத்துப் போய்ப் படுத்திருப்பாள். அப்பொழுது, இன்பக் கிளர்ச்சியிலே மலர்ந்த தளர்ச்சியும் அவள் பால் தோன்றும். அப்படித் தோன்றும் பெண்மையின் பொலிவான நிறைவான அழகு இருக்கிறதே, அதுதான் இல்வாழ்வார் போற்றும் சிறந்த அழகாகும்.

இறைவனை நாடிப் பணிந்து போற்றும் பக்தியை உடையவர், விரதங்கள் பலவற்றையும் தம்முடைய உள்ளத் தூய்மையினைக் கருதியே மேற்கொள்வார்கள். அவர்கள் அதனால் மெலிதலும் கூடும். அங்ஙனம், இளைத்துத் தோன்றுகின்ற மேனி, இறைபக்தி உடையவர் மனமுவந்து போற்றும் அழகாக விளங்கும்.

வறியவர்க்கு உதவுவது மிகச்சிறந்த பண்பாகும். உதவி உதவி ஒருவன் மிகவும் பொருள் குறைந்தவனாகவும் போயினால், அவனுடைய அந்தப் பொருள் குறைந்த நிலையும் சான்றோர்க்கு மிகமிக அழகியதாகவே தோன்றும். இஃதன்றிக் கஞ்சப் பிரபுவின் வளத்தை அவர்கள் அழகிது என்று ஒருபோதும் உரைப்பதில்லை.

வீரனுக்கு அழகு போர்க்களத்தில் தான் அடைந்த விழுப் புண்ணாக இருக்கும். கொடிய களத்தில் போர் இயற்றிப் பெற்ற வடு பெறற்கரிய பேறாகக் கருதி மதிக்கவும் படும். வடுப்பட்ட உடல் என்னாது அதனை அழகியதாகக் கருதுவதே சான்றோர் இயல்பு.

பொது நன்மைக்காகப் போராடுகிறார்கள் சிலர். அவர்களின் போராட்டத்தில் வெற்றியும் பெறுகின்றனர். ஆனால், அவர்களுள் சிலர் களத்தில் உயிர் இழக்கின்றனர். அவர் நினைவாக அவர்களுடைய பீடும் பெயரும் பொறித்த நடுகற்கள் நிறுத்தப் பெறுகின்றன. தம் உயிரை தம்முடைய இன நன்மைக்கு ஈந்தவரின் நினைவாகிய அந் நடுகற்கள், அந்த இனத்தவர் உள்ளவரை, அவர்கட்கு மிகவும் அழகியதாகவே விளங்கும்.

இவ்வாறு அழகு அவரவர் பண்புச் செவ்வியாலேயே அமையும். அழகெனப் பொதுப்பட்ட ஒன்றைக் கவர்ச்சி இனிமை கருதி மட்டும் கூறுதல் பொருந்தாது. இதனை அறிவாயாக" என்றனர் ஒளவையார். அந்த வெண்பா இது.


சுரதந் தனில் இளைத்த தோகை ; சுகிர்த
விரதந் தனில் இளைத்த மேனி; - நிரதம்
கொடுத்திளைத்த தாதா; கொடுஞ்சமரிற் பட்ட
வடுத்துளைத்த கல் அபிரா மம்.


"நாயகனோடு கூடி இயற்றிய சுரத அனுபவத்தாலே களைத்திருக்கின்ற நாயகியும், நன்மைதரும் விரதங்களை மேற்கொண்டதனால் இளைத்த பக்தரின் மேனியும், எக்காலமும் வறியவருக்குக் கொடுத்துக் கொடுத்துத் தன் செல்வம் இழந்து போன கொடையாளியும், கொடுமையான போரினிடத்தே பெற்ற வீரனின் வடுக்களும், பீடும் புகழும் குறித்துப் போரில் வீழ்ந்தோருக்கு நாட்டப்பெற்ற நடுகல்லும், சான்றோர் போற்றும் அழகான பொருள்களாகும்” என்பது பொருள்.

இதனால், ஒன்று அழகியதாகக் கொள்ளப்படுவது, அதனைக் கொள்பவரின் மனநிலையினை ஒட்டியும், செய்தவரின் சால்பினைக் கருதியும் அமைவதாகும் என்ற உண்மை விளங்கும்.

-    புலியூர்க் கேசிகனின் ஒளவையார் தனிப்பாடல்களில் இருந்து.



Gemini Generated Image

பூனை கண்ட கிளி

 

7. பூனை கண்ட கிளி

சோழ மன்னனின் நிலைமையோ தர்மசங்கடமாயிற்று. ஒளவையாரின் பேச்சிலே உண்மை ஒலிப்பதை அவனும் அறிவான். எனினும், கம்பரை அவர் அடியோடு மட்டந்தட்டி வருவதனை அவனால் ஏற்கவும் முடியவில்லை, அதனால் அவரை எதிர்க்கவும் மனமில்லை.

'பொறுமையே வடிவானவர்' என நாடு போற்றும் பெரும் புலவரான ஒளவையார், இப்படிக் கம்பரை வம்புக்கு இழுப்பதானால், அந்த அளவுக்குக் கம்பரின் பேச்சோ, செயலோ அவருள்ளத்தைப் பெரிதும் புண்படுத்தி இருக்க வேண்டும் எனவும் அரசன் உணர்ந்தான்.

அவைக்கண் இருந்த பிற புலவர் பெருமக்களும் ஏதும் பேசாராய் வாளா இருந்தனர். அவர்களின் மௌனநிலை, அவர்களும் ஒளவையாரின் கருத்தை ஆதரிப்பதாகக் காட்டியது. கூத்தர் இயல்பாகவே கம்பரை விரும்பாதவர். அவர் முகத்திற் படர்ந்த புன்சிரிப்பு பிற புலவர்களுக்கும் புரிந்திருந்தது.

நிலைமையை மேலும் வளர்க்க விரும்பாத சோழன், இறுதியாகக் "கம்பரை வெல்பவர் யார்?" என்றான், ஒரு சவால் போல.

அஃது, ஒளவையாரை மீண்டும் சினம் கொள்ளத் தூண்டுவது போலவே இருந்தது.

"சோழனே! கிளி வளர்ப்பார்கள் பெண்கள். அதற்குப் பாலும் பழமும் வைத்துப் பேசவும் கற்றுக் கொடுப்பார்கள். அதுவும் ஒன்றிரண்டு சொற்களைப் பேசக் கற்றுக்கொள்ளும்.

அந்த ஒன்றிரண்டு சொற்களைப் பேசத் தெரிந்ததும் அதற்கு அளவுகடந்த மகிழ்ச்சி பிறந்துவிடும். தனக்கு எல்லாமே தெரிந்துவிட்டது போலத் தன் அறியாமையை உணராமல் வெட்கமின்றிப் பேசிக் கொண்டே இருக்கும்.

ஆனால் அவ்விடத்தே பெரிய பூனையொன்று வருகிறது என்று வைத்துக் கொள்வோம். கிளியின் பேச்சு அறவே நின்றுவிடும். தன் நிலைமை அப்போதுதான் அதற்கு வெளிப்படும். தன் பேச்சு பூனையைக் கொண்டு வந்தது என்பதும் புரியும். உடனே, தன் இயல்பான தன்மை தோன்றக் 'கீச்சுக் கீச்சு' என்று உயிருக்குப் பயந்து கதறத் தொடங்கிவிடும்.

கல்வியின் சிறப்பு என்பது அடக்கத்திலேதான் இருக்கிறது. இதனை அறியாமல் சிலர் மனம் விரும்பியபடி எல்லாம் பேசுகின்றனர். அது அவர் அறியாமையைத்தான் காட்டும். கற்றோர் அவை முன்னர் பணிவு வேண்டும். பணிவின்றி வாய் திறந்தால் வருவது இழிவுதான். இதனை அறிந்து கொள்க" என்றனர் அவர்.

கம்பர் அயர்ந்து போயினர். தம் புகழ்மயக்கமே ஒளவையாரைக் கொணர்ந்து தம்மை இழித்துப் பேசச் செய்தது என்று உணர்ந்தனர். சோழன் மௌனியானான். அவையோ ஆர வாரித்தது. ஒளவையாரைப் போற்றியது.


காணாமல் வேணதெல்லாம் கத்தலாம் கற்றோர் முன்
கோணாமல் வாய்திறக்கக் கூடாதே - நாணாமல்
பேச்சுப்பேச் சென்னும் பெரும்பூனை வந்தாக்கால்
கீச்சுக்கீச் சென்னும் கிளி.


"கற்ற பெரியோரைக் காணாவிடத்தில் அரைகுறை அறிவுடையோர் தாம் விரும்பியபடியெல்லாம் கூச்சல் இடலாம். ஆனால், படித்தவர்கள் முன்பாகப் பணிவின்றி எவருமே தம் வாயைத் திறத்தல் பொருந்தாது. வெட்கமின்றிப் பேசிக் கொண்டேயிருக்கும் கிளியானது, பெரிதான பூனை அந்தப் பக்கமாக வந்தால், தன் பேச்சை மறந்து உயிருக்கு நடுங்கிக் கீச்சுக்கீச்சென்று கதறும். ஆன்றோர் அவையிடத்து, அறியாமல் பேசும் செருக்குடையவர் கதியும், அந்தக் கிளியைப் போன்றது தான்" என்பது பொருள்.

-    புலியூர்க் கேசிகனின் ஒளவையார் தனிப்பாடல்களில் இருந்து.

Gemini Generated Image

பழக்கமும் குணமும்!

 6. பழக்கமும் குணமும்!

நிலைமையைச் சோழன் உணர்ந்தான். எனினும், புண்பட்ட கம்பரின் உள்ளத்தைச் சிறிதேனும் மாற்றுதற்கும் விரும்பினான். அதனால், மேலும் சிறிது அவரைப் புகழ்ந்து பேசத் தொடங்கினான்.

'கம்பநாடரின் இராமாயணப் பெருமையை நம்மால் மறக்கவே முடியவில்லை. கம்பர் பிறவிக்கவிஞர் என்ற பெருமைக்கு உரியவர். ஒளவையார் சொல்வதில் உண்மை இருந்தாலும், அவர் கம்பரின் மீது வேண்டுமென்றே குறை காண்கின்றனர். அந்தக் குறை கம்பர்பால் இல்லை என்பதனை நாமும் அறிவோம்; நம் நாடும் அறியும்' என்றான்.

கம்பரைப் பிறவிக் கவிஞர்' என்று சொன்னது, பிறரை அவரினும் தாழ்ந்தவர் என்று கூறியது போல எதிரொலித்தது. அதனால் அந்த நினைவை மாற்றவும், சோழனுக்கு உண்மையைத் தெளிவுபடுத்தவும் ஒளவையார் கருதினார்.

அதனால், உலகியல் உண்மைகளாக விளங்கும் சில செய்திகளை எடுத்து உரைப்பவரும் ஆயினார்.

சிறந்த சித்திரக்காரன் ஒருவனைப் போற்றுகின்றோம். அவனுடைய ஆற்றல் அவனுடைய தளராத கைப்பயிற்சியினாலே வந்தது. அந்தப் பயிற்சிக்கு வாய்ப்பும் வசதியும் இருந்தால் மேலும் பலர் சிறந்த சித்திரக்காரர்களாக ஆகியிருப்பர்.

செந்தமிழ் வல்லார் சிலரைக் காண்கிறோம். முறையான தமிழ்ப்பயிற்சி அளித்தால், நாட்டிலே செந்தமிழ் வல்லார்கள் திரளானபேர் உருவாகி விடுவார்கள்.

சிறந்த கல்வி ஞானம் உள்ளவர்கள் என்கின்றோம். அந்த ஞானம் மனத்தை ஒன்றின்பால் உறுதி பெற நிறுத்திப் பழகிய பழக்கத்தால் அமைந்ததாகும். அந்த மனப்பழக்கம் பலருக்கும் ஏற்பட வழி செய்தால், அவர்களிலும் மிகப்பலர் ஏற்படுவர்.

சிலருடைய நடைகள் நமக்குச் சிறப்பாகத் தோன்றும். அது அவர்கள் நாள்தோறும் நடந்து வருகிற ஒழுகலாற்றின் பழக்கத்தால் அமைந்தனவாகும்.

இவையெல்லாம், இப்படிப் பழக்கத்தாலும் வாழும் சூழ்நிலையாலும் வந்தமைவனவாம். இவற்றைப் பிறவிக்குணமாகக் கொள்ளுதல் பொருந்தாது. ஆனால், பிறவிக் குணமாக ஏதும் கிடையாதோ என்று கேட்டால், உண்டு; அவை நட்பு, தயை,
கொடை முதலியன.

பிறரோடு நட்புடையவராகவும், பிறர்பால் இரக்கங் கொள்ளு கிறவராகவும், பிறருக்குக் கொடுத்து உதவுகிற மனமுள்ளவராகவும் ஒருவர் விளங்கினால், அவரை பிறவியிலே திருவுடையார்' என்று போற்றலாம்.

இந்தக் கருத்துக்களை அழகிய வெண்பா வடிவில் அமைத்துப் பாடினார் ஒளவையார்.


சித்திரமும் கைப்பழக்கம் செந்தமிழும் நாப்பழக்கம்
வைத்ததொரு கல்வி மனப்பழக்கம் - நித்தம்
நடையும் நடைப்பழக்கம் நட்பும் தயையும்
கொடையும் பிறவிக் குணம்.


"சித்திரம் எழுதும் ஆற்றல் கைப்பழக்கத்தால் அமைவது. செந்தமிழின் தேர்ச்சி நாவின் பழக்கத்தால் வருவது. சேமித்து வைத்த ஒப்பற்ற கல்விச் செல்வம் மனப் பழக்கத்தால் உருவாவது. நாள்தோறும் நடத்தையில் முறையாகப் பழகுவது நடையில் திறமையைத் தருவதாகிறது. ஆனால் நட்பும், இரக்க குணமும், கொடுக்கும் இயல்புமோ பிறவியிலேயே படிந்துவரும் நற்குணங்களாகும்” என்பது இதன் பொருள்.

இது, கம்பரின் புலமையினைப் பழக்கத்தால் படிந்தது எனக் கூறியும், பிறவிக் குணங்களான நட்பு, தயை, கொடை முதலியன அவர்பால் காணப்படாதவை எனச் சுட்டிப் பழித்ததாகவும் அமைந்தது.

இதனால், இந்த விவாதம் மேலும் சிறிது சூடுபிடித்துத் தொடரலாயிற்று.

-    புலியூர்க் கேசிகனின் ஒளவையார் தனிப்பாடல்களில் இருந்து.





Gemini Generated Image

எல்லார்க்கும் எளிது!

 5. எல்லார்க்கும் எளிது!

ஒளவையார் பாடிய பாடலும் பேசிய பேச்சும் சோழனைப் பெரிதும் வருத்தின. கம்பரிடத்தே அளவற்ற அன்பு கொண் டிருந்தவன் அவன். தன் அவையிலேயே, ஒருவர் கம்பரைப் பழிப்பதைக் கண்டு கலங்கினான். பழித்துக் கூறியவரோ நாடனைத்தும் கொண்டாடும் ஒளவையார், அதனால் அவரைச் சினந்து கொள்ளவும் முடியவில்லை. அவரைத் தெளிவுபடுத்தவே அவன் விரும்பினான்.

"கம்பர் எனக்கு வேண்டியவர்; இதில் ஐயமில்லை. ஆனால், அவரைப் பாராட்டியது அவருடைய புலமை நுணுக்கத்தை அறிந்து உரைத்ததே ஆகும். மற்றுத் தாங்கள் கருதுவதுபோல அவருடைய ஆடம்பரங்களை நினைத்து அன்று. அவரைப் போலப் பெரிதான காவிய நூலைச் செய்து சிறப்புற்றவர் வேறு யார்தாம் இருக்கிறார்கள்?" என்றான் அவன்.

கம்பருக்கு ஆதரவாகவும் அதேசமயம் ஒளவையார் பாரகாவியம் எதுவும் பாடவில்லை என்பதைச் சுட்டியதாகவும் அவன் பேச்சு அமைந்தது. அதனைக் கேட்டார் ஒளவையார்.

"சோழனே! தூக்கணாங் குருவியின் கூட்டினைக் கண்டிருப்பாய். அதனைப்போல எவராலாவது ஒரு கூடு கட்ட முடியுமா? குளவிகள் கட்டும் வலிய அரக்குக் கூட்டினைப்போல எவராலாவது செய்வதற்கு இயலுமா?

பழமையான கரையானின் புற்று எவ்வளவு அழகுடனும் நுட்பமுடனும் அமைந்திருக்கிறது ! தேனீக்கள் - கட்டும் கூடுகளிலேதான் எத்தனை அமைப்பு நுட்பம் விளங்குகிறது!

சிலந்தியின் வலையைப்போல எவராலாவது ஒரு வலை பின்னிவிட முடியுமோ?
இவற்றை யாராலுமே செய்யவியலாதுதான். அதனால், அவற்றையே தொழில் நுட்பத்தில் தலைசிறந்தவை என்று பாராட்டலாமோ? அதற்கு அதனதன் கூட்டினைக் கட்டுதல் எளிது; அஃதன்றி, வேறு எதுவுமே அவற்றுக்குத் தெரியாது.

அதனைப்போலவேதான் கவிதையும். ஒவ்வொரு புலவர்க்கும் ஒவ்வொன்று எளிதாயிருக்கும். கம்பர் விருத்தப் பாவில் வல்லவரானால், வெண்பாவில் புகழேந்தியார் இருக்கிறார். உலாவில் நம் ஒட்டக்கூத்தர் வல்லவர். இப்படி ஒவ்வொரு துறையிலும் வல்லவர் உளர். அந்தந்த வல்லமையினை அறிந்துதான் பாராட்டுதல் வேண்டும்! அதுதான் சிறப்பு.

"அஃதல்லாமல், ஒரு துறையிற் சிறந்தவரையே எல்லாம் அறிந்தவராகக்கொண்டு, அளவுக்கு மீறிப் பாராட்டுதல் கூடாது. அவரும் அனைவரினும் பெரியவர் என்று செருக்குறுதலும் தவறு. ஒவ்வொருவருக்கும் பிறராற் செய்யவியலாத ஒன்றை எளிதாகச் செய்வதற்கு இயலும். இதனை உணர்ந்து அடங்கியிருப்பதுதான் புலமை உடையவரின் பண்பு” என்றனர்.


வான்குருவி யின்கூடு வல்லரக்குத் தொல்கறையான்
தேன்சிலம்பி யாவருக்குஞ் செய்யரிதால் - யாம்பெரிதும்
வல்லோமே என்று வலிமைசொல வேண்டாங்காண்
எல்லார்க்கும் ஒவ்வொன் றெளிது.


"தூக்கணாங்குருவியின் கூடும், உறுதியான அரக்கும், பழமை கொண்ட கரையான் புற்றும், தேன்கூடும், சிலந்தியின் வலையும் நம்மில் யாவருக்கும் செய்வதற்கு அரிதானவையாகும். அதனால் யாம் பெரிதும் வல்லமை உடையோம் என்று எவரும் தற்பெருமை பேசுதல் வேண்டாம். ஒவ்வொருவருக்கும் ஒவ்வொன்று எளிதானது என்று அறிவீர்களாக" என்பது பொருள்.

ஒளவையாரின் பாடற்கருத்தினை அந்த அவையாலும், கம்பர், சோழன் ஆகியோராலும் மறுக்க முடியவில்லை. எப்படியோ தன்பால் வளர்ந்துவிட்ட கம்பர் மீதுள்ள அளவற்ற அன்புதான், அவரை அளவுக்கு மீறிப் போற்றுமாறு செய்தது என்பதனைச் சோழனும் உணர்ந்தான். அதனால் புலவர்கள் பலர் புண்பட் டிருப்பர் என்பதனையும், தன் மீதுள்ள அச்சத்தாலேயே அதுவரை ஏதும் கூறாதிருந்திருக்க வேண்டும் என்பதையும், அதன்பின் அவன் தெரிந்து கொண்டான்.

-    புலியூர்க் கேசிகனின் ஒளவையார் தனிப்பாடல்களில் இருந்து.





Gemini Generated Image